我獨坐門前心太亂
女孩兒心事誰又猜得破
我悶悶不樂，唯有把大好光陰來消磨
今日係The Sentimental Animals第一次夾歌！(真係好低能……我自己打出黎都忍唔到笑……)
之前同beeyung題起呢個名，beeyung因為冇睇過黑馬王子而覺得個名好型……的確，但你林起張家輝個死人樣，真係聽親呢個名都要笑的……
頂，其實係咪真係因為個pick up鬆左呢？最底音果兩條我用力發會出蜂音的，其實屋企都會，但會停，應該真係同pickup有關掛，我係屋企又懶得扭佢……因為我係屋企都玩得好細聲或者唔插amp咁彈的，我呢d低水平要慢慢黎嘛。
其實我唔只買左HOME同School of Rock的，仲買左本書，不過本書搵唔到圖，所以冇update了。當然，安妮的日記係一早睇完左，真係睇完好耐。
返而想講一下《祕劍．柳生連也齋》。呢本野真係睇極都睇唔完，估唔到咁長的……不過我最終都睇淨一篇，唔，我係跳左去睇最後既《小次郎拜候》先的。未睇既係《清兵衛的末日》，一睇之下我真係以係電影《黃昏清兵衛》既原著，原來唔係，黃昏清兵衛同隱劍鬼爪都係藤澤周平的，而我而家睇既係五味康祐。
五味康祐寫既故仔唔易睇，好多條線，唔專心睇真係好混亂，個份段落既意思亦唔容易睇出黎。當中令人最有印象既一定係講伊藤一刀齋既後人，長居深山，出山之後俾人拉左去打捧球，非常有趣。至於書名既柳生連也齋，應該係咁多劍客約戰之中寫得最有迫力既一篇，柳生連也齋嚴包背住既就係柳生家既名號，對手係從宮本武藏既徒兒，冇結局，但當然當你知道柳生連也齋六十幾歲先死，最後噴出鮮血既邊個亦唔駛講。
但，其實即使唔從外掛既資料又或者篇章既名，從故事入面決鬥之前，嚴包同鈴木綱四郎既遭遇同所做既事等，贏既仍然應該係柳生。
題外話，五味康祐唔係吉川英治，宮本武藏係五味故事入面出現既形象，並冇神化，亦非常體現出「兵法」係乜野一回事。另一方面，如果大家唔知，武藏既宿敵其實並唔係佐佐木小次郎，雖然呢一戰係最被浪漫化既一戰。事實小次郎劍技應該係很好很好，但真刀對陣，技唔一定係最重要的，大家從傳說中武藏遲到巖流島、《寬永劍士》中武藏一句說話就安然斬殺居合高手左六衛門等等，兵法，唔係邊個出劍最強最快，只係邊個可以斬殺對方而已……
真正終生食住武藏既，係柳生兵庫助，尾張柳生既傳人，亦即係井上雄二漫畫《浪客行》果個出場冇耐就去搵隔離村女子開心的那個。《柳生連也齋》彷彿就係填補兩人終生未交過手既遺憾而出現既故事一般呀下……(事實武藏除左斬殺上陣經驗非常淺既小次郎以外，從來冇同名氣享譽全國既劍客交過手)
但我不太喜歡另一篇標題作《祕劍》，拎芥川賞既《喪神》都唔算太喜歡，《猿飛佐助之死》亦唔係太鍾意，呢一篇太感情用事，但感情不見得深刻。而且我始終被較喜歡真田幸村係大阪之陣決戰前一刻私下將女兒及兒子交託片倉小十郎重長既版本，多於呢個於大阪城內為片倉小十郎景綱所獲……而且文中既小十郎景網形象不好……
《斬櫻》有點浪漫化，但非常精彩！《真假荒木右衛門》就係混亂既代表作……但我真係唔夠心力，好快咁睇完就算。
希望今晚可以睇完佢……之後就終於可以睇Andy Warhol呀下。題外話，Factory girl講Edie Sedgwick，講Andy Warhol，但提都冇提The Velvet Underground，冇Lou Reed冇John Cale，話哂佢地同Edie都有過一腿的，令人失望呀……
我仲有本搖滾神話睇左1/3左右……放低左……
No comments:
Post a Comment