恩田快人﹣推特系列

 

Judy And Mary既貝司手。記得當年我還是懵懵懂懂時，同人講我鍾意JAM，一位兼職既唱片監製話：「係呀？個Bass好勁抽喎佢地。」果一刻，差不多可以話係我除左「鍾意聽」搖滾學之餘，覺得自己要開始「學下聽」野，唔係做一個普通學迷咁簡單。

係JAM成名之前，據講小恩已經係頗有名既地下樂手，當時佢既樂團JACKS'N'JOKER去到北海道參與電影演出いつかギラギラする日（名導．深作欣二既電影，恕我真係搵唔到中文譯名）而認識到函館人YUKI。當佢聽到YUKI既demo後，決定要另組樂團而退出JNJ。

唔駛講，就係因此組成左JAM。初期一直以恩田為主導（初期錄音以及工資都係小恩自己荷包！)，之後慢慢結他手TAKUYA加入創作甚至搶去創作靈魂一職，以至傳不和，呢啲係後話。其實我亦唔係想講JAM歷史，我係想講小恩係手紙をかくよ裡面果手bass。

如果聽小恩係Pop Life大碟以前，佢手Bass早已好強勁，尤其佢係重金屬+叛客底，右手用pick既技巧非常堅實，兩隻手都係高速得黎又準又實淨，實於底子非常深厚既Bass手，而佢亦都有好多有groove又有旋律既bassline，一首歌內既同樣既段落都經常有變化。

但我想講手紙をかくよ既原因係，整個bassline旋律極之甜美流暢，尤其係verse因結他比較收斂所以佢企得較出，盡顯旋律美。到chorus又稍稍退回去丁點俾vocal發揮，結他一出黎拆聲solo（TAKUYA速彈段落彈得有點太模糊了啊！），bass就更低調遷就。

Bass手好講求既就係唔好成日企出黎搏曝光，但一企得黎就唔好浪費表演機會：個intro少少一段，簡直係點石成金。而結他solo後個半截verse，盡顯小恩駕馭旋律能力。除左快、狠、準呢啲技術力之外，呢首流行味咁重既手紙をかくよ完全俾小恩發揮到佢旋律功力一樣咁深厚。

當初我學Bass，其中一個原因就係小恩。

歌姬﹣推特系列

Why，Annie Lennox 1992年既細碟，收錄係佢首張個人大碟Diva裡面。Diva，查意大利文原指女神。咁當然就唔係指高登仔講果種女神啦﹐係真係有神力果種女神。之後就用黎形容非常受人敬仰既歌劇女歌手，伸延至英語以及其他文化界別，例如流行樂。

Diva翻譯過係中文係叫做歌姬。歌姬一詞，是否被本地媒體濫用我不知道，外國媒體有冇濫用我亦唔知道，但我就見過Diva一詞被用係諸如Madonna、Christina Aguilera以至Beyonce、Lady Gaga身上。

我為人比較守舊，Diva又好歌姬又好，是必需要有一種神力般既誘人魔力。諸位，呢二十幾年黎流樂行界如果只能夠有一個歌姬，呢個人一定係Annie Lennox。

Annie Lennox係成名於八十年代既新浪潮二人樂隊Eurythmics，拍檔係同佢糾纏不清既Dave Stewarts。當Eurythmics陷於「好似解散左」既時候，Annie Lennox遠離樂界去左生女。Diva是為復出後首張個人大碟，第一首歌就係Why。

Annie Lennox話Why佢只係用左十分鐘去寫，當時佢其實係陷於一個創作危機之中：係Eurythmics佢有Dave Stewarts。佢認為Why既歌詞道出左佢離開Eurythmics迫於要個人進行創作既困境；而寫Why呢首歌卻只係用左佢十分鐘左右。

我自己覺得呢首歌，由歌曲至到music video，都為Diva大碟以至Annie Lennox既個人發展生涯一錘定音：Annie Lennox就係歌姬。外表、言行可以浮誇，但內裡不其就流露出複雜、敏感、感人至深既一面。係鏡頭前化粧、撫手弄肢，仍難掩一個深刻微笑既真誠。

歌曲只有AAB三段，華美既修飾下卻係Annie Lennox最不經修飾既心底獨白：十分鐘既原真獨白。Annie以向來戲劇化既演繹，細細唱出心裡面既疑問：最後一段更加仿似隨意叫喊出心底既說話，每次細心去聲都會感動至起雞皮。就係呢一種天賦魔力，是為歌姬應有的神力。

難得我講vocal多呀；又，收撚皮啦Lady Gaga。