好老實，我覺得隊長智上半場應該係我見過最差既半場，步頭唔爽得黎，仲好唔醒神。下半場件鬼仔麥基唔係佢果邊就好似好返。而佢身邊既思朗榮，早兩場都末段都會見佢真係莫哂，但今場好勁，末段係邊線狂推左好多次，而且仲有力做假腳！淨係果幾下來回都推左成百碼！
但係班前鋒實在浪費了太多機會，如「ESPN智將」黃興桂話齋，入唔到「燕梳球」好濕濟架嘛！完場時有罵戰睇，有港男(叔)喝罵洋妞。我就襯走時見安基斯係欄邊，叫左聲「Chris！」佢真係望過黎，我就對佢竪一竪「指公」呀下，佢笑笑口揮一揮手。其實我都嘗試過叫巴西中堅祖爾，但佢冇望我，其實我唔知佢個名點讀，我當佢英文咁讀架咋，Joel，咪當Billy Joel果個Joel咁讀架咋，西班牙文都仲可以扮下丫，葡文真係唔識。
有機會問一問隊長智先。係場入面叫下d「球星」其實幾過癮的，尤其當你叫佢，你見過果個暗爽既樣子(如果係女叫，仲要係索女，應該會明爽了)。記得有一場流浪，馮祺換入時，都有阿叔大嗌「馮祺」！佢都擰轉身揮一揮手呀下。
羅倫士被換走時直入更衣室，路經大埔球迷區前被柴台，佢笑笑口咁，佢全場都已經一直咁樣笑，唔鬼知佢乜意思了。我其實有少少衝動大叫「Lawrence！good game！」串佢，因為佢今日真係踢得好屎。
但問題係，以羅倫士既身型，係可以隨時徒手將我分屍的。
咁當然，我隊長智行近時我亦有叫佢啦下。
呵欠。
No comments:
Post a Comment