點知遲左少少既我地，入場時我一眼就見到，排頭既隊長，係李威廉，心知呢次陳旭智係後備了。
果然，立一立眼，佢係場邊由更衣室入口路緊去後備席。
我覺得呢張相真係影得好唔錯，雖然話南看台冇乜人坐，但真係咁0岩成張相都得係陳旭智一個人。(唔計隻手……)
唔，0岩0岩仲見到有d留言講陳旭智既表現唔掂呀下。(雖然有傳隊長做後備係戰術問題呀下)
(之前有人留言問做乜陳旭智唔係正選，條友仔竟然問出post果個係咪我，有冇搞錯呀，個留言d內容咁膠，當然唔係我)
(更仆街係，果到好多人扮球員出post製造混亂呀下，我除左n年前係lab4俾佢知道既情況下出一個讚21號有型既post俾佢派人kill左，同埋季初話防守為先係冇問題之外，冇出過post啦，果到太多罵戰post喇)
真係，唔好成日話我抽佢水。咁首先，d批評既果d黎講，我個別都同意，但呢d問題就唔係淨係陳旭智既問題喇，而係丙組一齊打上黎果班都係咁。甲組波始終同乙丙組有距離，亦都係事實，陳旭智黎講，未叫做甲組水平，都係事實(你睇陳肇麒，都係踢大埔，好快已經俾甲組會睇中啦)。
咁我覺得呢，陳旭智最大問題係唔夠硬淨了。以佢既身型其實應該幾殺食，但就明顯踢唔慣衝撞波，對抗性唔夠。另一點我覺得，佢就係果d盯位多過盯人既中堅。真係唔會見到佢波到人到咁殺得甩對手，返而cut pass呢d就真係見到唔少，封人出腳呢d又似乎唔錯，但睇人唔夠穩唔夠硬亦都係的。(真係唔好話我公開評論佢呀下，係學校我都唔知俾多高帽佢戴啦，咁佢果陣又的確係比較屈嘛，唔去練波都老奉正選)
(咁，佢唔去練波，聽實又好似冇乜紀律。咁其實，佢大埔已經要練波丫嘛，佢都間中會去u team練波，聲稱成日唔去練，費事教練唔鍾意。我仲記得有次同佢食完飯，之後我被大粒燊徵召出去再食一次飯，返hall時都剛係bridge link撞到練完波既佢呀下，我舊diary應該有提過類似既事)
球場係英雄地，總有人正選總有人後備。唔知道早排果d留言版罵戰係點黎，但我始終覺得，球隊講既係紀律。好老實，將心比己丫，冇正選踢緊係唔服架，俾d新入隊又好似唔係勁自己好多既人搶左個位又緊係唔服架。
唔服咁又點呀？出聲咯！
拿，咁咪就係問題囉。總之，學黃興桂話齋，Team呢個字入面冇i架嘛。(咁，就當然唔係佢講先啦下，不過就有入試過將佢歸入黃興桂9up語錄……)
你唔服，想拎返正選，做d野，唔係問題。出聲小就當然冇用，呢樣完全只係發洩啦下，只會搞到自己又唔會有正選又影響士氣。你做d野，為自己之餘，係唔應該影響到球隊嘛，你地話係咪先。兩季前既多蒙特呀下，雲馬維克唔鍾意列瑾，嫌佢慢同突破能力低，唔係佢用開果種攻擊球員，死都唔用佢，d人傷都唔出，連推d質素平平既青年出黎都唔肯用佢。加上佢仲試過係電視訪問公開評擊雲馬維克，於是最終整個上半季17場出場時間都未夠半粒鐘。
最後點呢？列瑾操練表現好好，友賽表現好好，歇冬後雲馬維克迫住要用佢出下，最後一下就搶返個正選返黎個下半季仲入唔少波添。
呢個故事教訓我地，出聲小佢係冇用的。冇用得黎，搞到班波亂哂龍就仲麻煩。
緊係大家一齊為隊波有成績而付出架啦下話？如果只係因為冇左正選，寧願一拍兩散，搞到內亂冇哂士氣就條氣仲順d，咁一直以黎，開波前圍埋嗌「大埔」又點解先？
不如十一個人分開，自己大聲嗌自己個名算數啦真係。
唔，咁，我當然繼續入場啦下，又睇下佢幾時爭得返個正選返黎呀下。
No comments:
Post a Comment