講起曲與詞。我搵唔返個source，但黃耀明講過，本地樂迷好重視歌詞，而去到一個近乎「讀詞」既境界，幾乎只睇歌詞而忽視音樂。呢一點我幾讚成的。流行曲可以有好多角度去欣賞，唔係話忽視歌詞，但如果忽略左詞本身就係一種「音樂性」文體，無視音樂性咁去賞詞，的確係片面的。
而又，黃霑評過紫色的灰暗，亦話過歌手應該專心唱歌，唔應該半桶水學人作曲作詞，只需做好自己既工作。呢一樣野我深信好多人唔同意，尤其喜愛西洋音樂、睇慣搖滾樂手一手作曲填詞主唱既樂迷更加唔會同意。但我呢個差不多只聽經典搖滾既扮樂迷，卻十分同意。
其中一樣好簡單，就係中文—尤其廣東話詞，非常難填。廣東話有九聲所以難填此其一；廣東話口語跟書寫非常不同此其二；中文文字本身色彩濃烈語意變化甚多此其三。要填好既詞，文字功力少啲都唔得。
其二，留意係搖滾樂未出世之前，其遠祖民歌與藍調係西方音樂界都並非主流商業音樂，而英美商業流行樂一直都係由專業作曲填詞人以流水作業模式生產流行曲俾「明星」去唱的。呢種模式亦一直存在，亦係沒有樂壇只有娛樂圈兼唱廣東話既本地樂壇最適合既製作模式。（我話既）
即使不論歌詞，留意樂手自作自唱都係六十年代由披頭四、或卜戴倫等第一代白人搖滾巨星帶動。在此之前，白人搖滾樂手都是從黑人們—初期搖滾、節奏藍調處偷歌唱的。呢種六十年代獨有的粗獷創作力（借用村上春樹既講法），從沒有輸進本港。
既然冇其背境，想輸入呢種製作模式是不會成功的。即使西方樂壇，如近年非常受追捧既才子Bruno Mars，佢啲歌詞一樣狗屁不通矯情做作：「你有所不知喇！我可以為你接住個手榴彈、空手入白刃、跳火車軌⋯⋯總之為你做乜都得啦！」我絕對讚成霑叔既講法，冇才華既，就唔好賣才華。
No comments:
Post a Comment