一朝早，落住狗屎行到去火車站，頂佢列車故障，唔怪得越近火車站d人流越奇怪，咁我都走返轉頭去搭巴士，雕喇叭等左幾個字都冇車，越來越大雨我把遮仲開始漏水。當我排到入去第四有瓦遮頭果陣(前面d人上左其他車了)，我留意到排頭三個一直都係果三個人。
好喇，270A終於出現，刁，唔埋站既？原來佢認為部車滿哂人。正當我成功將一股怒火壓制返落去既時候，我隔離個男人卻即場小老母，果一下我真係好想笑出黎！有時d野我唔講，始終有人會幫我講的，同我出左啖氣。佢仲要唔係黎來的，小得有原有因既「x你老母x！等x左你半個鐘，你咁x樣走左去！」咪係！你睇，佢小得幾合情理！絕對唔係亂來的！
唔，返幾日工咁就第一次遲到。我都唔記得我係大學第一次遲到係幾時了，但我好記得我返學第三日就第一次走堂。點解？咪又係落大雨囉！返到去對腳濕哂，返hall坐下算數。
我好以冇講過Sailor Pluto再冇份做美少女戰士既問題？我好記得見過有人話，大約係話人類自大可以擅長定義呢d星體乜乜物物，Exact Wording唔記得但大約係呢個意思，即係人類有僭越之嫌。你唔好話你唔明做乜人可以咁做，我都唔係好明點解你會咁講法。大佬，乜野係行星，乜野係矮行星，呢d都係出於人類既認知，只係人類為左方便自己認識呢個宇宙所以作出定義，從萬物異同既特色去做分類。如果你認為咁係有錯，咁真係唔需要返學了。個冥王星唔係放係地球入面，但佢同你屋企塊石屎牆一樣冇分別，同樣只係宇宙入面一件野。咁我亦可以話，我唔明你點解可以妄自尊大咁叫果塊石屎做牆，可以叫姐夫做朋友，但又叫房事龍做淫蟲(其實姐夫都係淫蟲個set入面)。唔好因為冥王星大粒同遙遠過姐夫就當佢威過姐夫先得架，同樣亦唔可因為姐夫短你就睇佢唔起！你地話係咪先？(我實在戒唔到呢d句式，都話睇newsgroup害人……)
講起呢d，我記得行星呢一課係響小六教科書的。小時候既我，因為我家姐大我一書，通常我都會早一年睇左本科學書的。不是嗎？小學d科學書係一年有趣過一年的，咩九大行星，又有講鯨魚、殺人鯨呀咁，幾過癮。其實我份人比較自我中心呀下，我一直以為人人同我一樣，年少無知果陣都會對呢類野好有興趣，例如唔駛特登背都會記得九大行星既排序。
但我係中六果年，先比較認真發現呢d野係who fxcking cares的。果陣我竟然係天文學會的，天文學會學人搞觀星請左個人黎教，d港女同學係咁逗果個人(我記得佢好似細過我地的)，叫佢背九大行星次序，佢輕鬆背出黎，眾人大驚。唔，大家都有一個認知，因為香港教育膠味十足，任何野成為學科既時候，佢就會變得沉悶令學生討厭，但佢係課外話動咁d人又未必會討厭的。通識科黎講，會唔會令學生越來越唔識呢下……
No comments:
Post a Comment