2003 年 06 月 10 日 星期二 【晴】
某年某月某凌晨三點半，工業七台，頻道259.4，節目《林記談情地帶》，主持：林記。
林記：返到黎直播室，0岩0岩聽完既歌係《少理阿爸》，大家都要記住，唔好掛住拍拖就少理阿爸呀，唔係就正不佳了。好喇，繼續Phone-in時間，電話旁邊有一杯奶茶同一件蛋治……唔，打上黎既聽眾係姐夫。喂？姐夫？聽唔聽到呀？
……(十秒鐘既寂靜無聲，令孤寂既夜晚倍添無奈)
林記：小喇叭……咁我地去聽多隻歌先，不如就聽古仔既今期流……
姐夫：喂？我係姐夫。
林記：鄒生，下次唔好再浪費我地寶貴既時間，快少少出聲唔該。好喇，姐夫你又有乜愛情煩惱呢？
姐夫：我俾條女飛左呀，其實佢仲愛我架呵？
林記：應該唔喇，愛你又會飛你？你估拍戲咩。
姐夫：唔係喎，可能只係想我乙水下佢姐，佢應該仲愛我架呵？
林記：咁佢無啦啦做乜要飛你先？
姐夫：佢話我正不佳，又多壞習慣喎。其實我都唔係好多壞習慣姐，去廁所唔閂門、去完唔洗手、出街例遲半粒鐘、一條底褲著成個禮拜唔洗、出街四圍鴿女、係條街大大聲講粗口咁囉。
林記：大早你講個D壞習慣我全部都有，唔怪得我都溝唔到女啦……講返你果筆先，咁你都抵俾人飛啦。
姐夫：可能佢只係想迫我改哂D壞習慣，之後同返我一齊呢？
林記：咁你有冇改丫？
姐夫：有呀。
林記：咁你有冇話佢知。
姐夫：有呀。
林記：咁佢有冇同返你一齊？
姐夫：冇喎。佢話佢已經同好有錢果個萬甘油王子一齊，仲好好感情。
林記：咁你收得皮啦。
姐夫：唔係喎，可能佢只係想呃個萬甘油王子既錢，再返黎我身邊呢？
林記：有冇咁理想呀，你唔好話佢俾個皇帝你做。
姐夫：都有可能喎，可能佢同萬甘油王子只係俾皇帝我做既第一步，佢其實好愛我架。
林記：挑……
姐夫：講到尾，你覺得佢仲愛唔愛我？
林記：唔愛。
姐夫：唔係喎，你問心丫？
林記：唔愛。
姐夫：都叫你問心咯，唔好玩啦。
林記：唔愛。
姐夫：妖，我話叫你問心呀，我信你喎！
林記：……愛囉咁。
姐夫：拿！我都話架啦！
林記：你一早有答案仲打上黎做乜七呀？拎我黎消遣呀？
姐夫：唔係呀，我想聽下其他人既客觀意見丫嘛。而家你都話佢愛我，我就肯定左佢係愛我！
林記：！……你都痴孖筋既，浪費哂我既節目時間。好喇，今日既節目時間已經差唔多，節目結束之前，我送多隻歌比大家，特別點埋俾姐夫，以及之前打黎既肥偉、短成同大粒燊。各位聽眾，送上既係，LMF既《磡家拎》。
No comments:
Post a Comment