見到周慧敏既廣告。我相信，由我呢一代向上計起，都唔少人封過佢做女神。
我突然醒起，呢類學生情人少男殺手玉女掌門，直到我都仲有留意既情況下，周慧敏、楊采妮、梁詠琪都可以講係其中三個，但係大家留意！我三個都未曾迷過的！甚至乎，我係三個都有少少討厭既感覺！原因？唔知喎。但而家對周慧敏都堂算有返好感，楊采妮結婚以後都冇乜野，但梁詠琪倒是從來沒有半點少d唔討厭。
好奇怪呀呵？係囉。我記得，我果陣做暑期工，果陣d同事成班都係女人，年齡偏大，有個師奶同事問我，你地而家d男仔鍾意邊個架呢？「……」我真係唔識答……因為我真係唔知，但好快都有一個女同事搶答：「而家d男仔個個都鍾意梁詠琪架啦。係咪呀？」「係呀……」吾敷衍之。
最近，少男殺手同玉女掌門似乎大有分家既趨勢。的而且確，以前玉女掌門是註定少女Fans，據我研究所得，係因為女人都善妒。所有最大聲小d玉女明星扮斯文既女仔都係扮斯文但又唔夠人地玉女既表表姐，多數都係發現點扮都唔夠人玉，扮極都只係肉，因此深恨之。另一方面，男人都漸漸傾向唔鍾意玉女，鍾意d走淫蕩路線，亦係有跡可尋。
講開又講，有冇人真係去有睇Femme Fatale個Music Video？(Click 隔離個Label "VU")有冇人留意，係最後，有一句Nico係入慢左的，Lou Reed手擰轉頭望佢，Nico又望返住Lou Reed，之後私自Skip左一兩句冇唱。Nico回頭呢一望，配合佢全場Q起對手，真係型到冇朋友。而家d女歌星甩左一句會點呢？一係咪詐唔知囉，都仲好，「喪笑」就仲乞人憎了！但Nico呢一下唔掩飾又唔失控但略帶自我的佻皮，配合埋台上既一份斯斯然然淡淡定定，呢d就係由骨子裡自然而發的星味及內涵了！冇得呃的！唔係好似果d「可愛」「自然」咁可以裝的(仲唔掂既係，有d人打假球都打到出哂面啊！) (拉遠少少，櫻井和壽係DVD都有一句甩嘴，佢都不禁趣怪地一笑先繼續唱落去，拿，呢d又係星味。當然你話同Nico好唔同，係架，Nico果種感覺係冷艷，櫻井係親切，好唔同，但一樣咁有味呀下)
想起而家d女明星呀下，明明「慾女」扮「玉女」封哂「聖」其實應該封「性」果d，又想起早排有女歌手大談處女膜、又有個人地話佢A級佢就話乜得咁細咋咩，對，很自然很率性啊！但就係失去左星味，更不要談自然而黎既星味了。
星味黎講，我覺得最重要既元素就係一份可膜拜性，有一種唔平凡先可以有既氣質。你話唔興咩？不見得，今時今日仍然好多人鍾意張國榮、劉德華、王菲以呢類星味十足既「偶像」。問題係，而家d明星重視係入屋，仲係要入d發育都未完成既兒童既屋，d所謂偶像都冇一份星味，變左同你隔離屋個港女/MK仔一樣。有親切感咩？係掛，我唔知有乜咁吸引，正如我完全唔覺得隔離屋個港女/MK仔有乜咁吸引。
唉，可能我真係老喇。
No comments:
Post a Comment