聯華真係好硬淨，學淫泰既口吻，「我夠膽講句聯牛真係好硬淨。」
其實我唔覺得係特別茅，但出腳好狠好勇又係真，但都未算好多蓄意踢人，加上第二個紅牌之後，球證見佢班人開始起火，五五波都吹返俾佢地，都總算收到火，都冇乜出過收山剷丫。不過上半場已經紅兩件要九人應戰，嘿。
聯牛季初入唔少波既中鋒維雅芭……第一次見佢，身型真係好殺食，可以同迪天奴爭一日之長短……不過仍然受制於祖爾！呢個真係港甲盧斯奧，後面高波就俾佢頂走哂， 推上黎助攻又真係好殺食，有次生波殺到入小禁區爭d執雞，入第二球角球頭槌頂到死哂角添。
相？今日影左好多相，因為我地有影相佬人稱cs朱古力波既波波入場。平時我用傻瓜機影，今日波波就帶左支小鋼炮入黎，祖爾慶祝果陣係正佢支炮面前！d相真係相當唔錯！但我懶resize又懶upload，遲d補啦下。隊長踢左都好幾分鐘，都有機會踢下波咁的。
南華黎講，0808，數到0:8，好輕鬆，泰利史高斯予取予攜，祖雲奴域乜鬼野瀟灑野都玩哂出黎，鄧景煌又不停開到上黎出波，實在太容易了。其實人同陣都係差不多阿曼龍手頭上果班，排陣用人都係相約，只係米路呢兩場用兩邊做得好好多，拉得開黎踢，而阿曼龍果陣就中場中間直線不停吊上去俾迪天奴。
係香港踢波……只要係一大把頭髮都會俾人叫和仔的。謝敏榮如是，歐陽耀沖如是……
No comments:
Post a Comment