華家堡一開波大打快波，大埔球員一上腳就四唔個人黎搶，壓到大埔波都冇乜機會踢，氣勢好強。佢地好多俾波走位，整體組織力好似好好咁，但係技術意識實在太有限，基本上完全拉唔開大埔中場同防線，和仔同黃鎮宇兩邊都做唔到野，中間果個假泰利又形同虛設，波就拎住黎踢，禁區都入唔到。本身大埔d反擊都打唔開，不過上半場中段就越來越似樣，點解呀？華家堡d人冇力了。
呢d就可以話由球員至教練都欠經驗既結果了，唔識留放。大家都知香港球員體能唔夠，日波頭場你成個上半場都打得咁快？而事實係，大埔打得咁慢，你打得咁快，你都拉唔開人地既防守，咁兩班波到下半場其實體能會有好明顯有分野了。二黎華家堡果班人其實好多係09既人，發育都未完全啦唔好話，個右中堅上半場尾段已經踢完全冇哂，好似踢左90分鐘咁，最終大埔入兩球都係做落去左路搞掂。
下半場大埔d反擊仲越來越有威脅。不過場波第一個轉捩點，就係大埔門將冇要到趙俊傑個跣後，冤枉角球俾人追返一粒。拿，上半場我一直都唔滿意大埔兩邊既表現，蘇來強除左同思榮做左個撞牆，平時都係上腳太多，成日lun住個波唔放。直至下半場華家堡冇哂氣，右路李威廉生返，我同阿洲都同意，抽起蘇來強或者呂志興，放個快到甩碌既李康廉黎抽水，應該可以鎖定勝局了。
但巴貝利似乎係好保守果種英式領隊，隊波個勢唔輸就唔會換人，d人唔傷亦唔會換。到俾人角球追一粒，佢先換個右閘郭詠燊入黎踢右中場守佢(不過，起碼輸返一粒之後換郭詠燊而唔係李康廉我覺得係0岩的)。呢一粒已經打起左華家堡個勢，不過可以留意，華家堡仍然係冇能力係禁區入面做到任何威脅的。
最後和仔可以點呢？就係靠人望！球證開始決定要做大埔，等和仔第一場教波踢聯賽唔駛落筆打三更。首先，祖爾係冇動作，以及陳旭智已經包左落黎既情況下，冇動作加未形成單刀，被球証程愛祖吹罰對方單刀情況下侵犯對手，無啦啦紅牌。足總網頁短短一句「88分鐘，和富大埔祖爾犯規被判罰離場。」唔，任何人都講唔到點解係紅牌，出腳粗野咩？單刀咩？乜都唔係，都唔知解釋果球波可以係一個紅牌。如果我係球證，呢個波頂多係吹罰，黃牌都未必有。
大埔有一段時間連趙俊傑都出左場治理，九人應戰，華家堡立即空群出擊。仍然做唔到有威脅既機會，最終程愛祖見到入返場既趙俊傑係禁區邊落腳鏟波，機不可失，即使係清脆踢到個波，偉大既球證都決定係時候俾個十二碼，以獎勵全場拼搏華家堡但無甚斬獲、空有神之子歐陽耀沖但全無威脅、卻又擁有德高望重教練李健和既華家堡。
一句啦，其實我覺得巴貝利換人果斷少少，程愛祖用屎眼吹場波都做唔到2粒波俾華家堡既，佢地都入唔到禁區。(有消息指，場內人有問華家堡領隊，陳sir既回應係，「我都覺得唔係紅牌，我都覺得唔係十二碼，不過球證咁吹冇辦法。」)
全場比較令人覺得高興既係，大埔班波冇退步，祖爾又真係好勁抽，而且班波都應該仲有得進步(今場特別要讚陳思榮，完場我都有讚陳旭智硬淨左，不過佢態度非常謙虛呀下，話對面個外援前鋒假泰利屎，咁又係呀，唔係特別硬淨，冇速度，可能射術好啦下，但以華家堡既組織力，應該都係收檔了。兩個外援中堅，假夏格維斯係比較好，殺波好辣又幾靈活，另一個唔掂啦，同香港d本地中堅差不多水準而已)。不過大埔對住呢班波都拎唔到3分，之後真係要加把勁了。
尾場唔多講，晨曦個基奧雲尼，技術射技速度都一流，一流射手，淨係佢一個已經解決左晨曦上季前鋒線唔得既問題，有左佢加埋本身果班係本地技術都數一數二既中場(靚昆、耀仔、朱兆基、劉強呢條華人中場線都唔會差得過有鬼佬果d，佢地本身又夾到好熟，仲要簽左隻好高級既巴西防中)，同埋高尼路鎮住既後防，今季都係時候重返挑戰多過一個冠軍既行列了。(陳旭智話冇出場果個法比奧蘇沙都好勁，另外大馬古點名稱讚有拼勁既比沙，真係滿場飛，佢唔係特別做到d乜，但拎波就向空位推生，推同俾波時間都決定得好，淨係呢樣已經夠哂好用啦)
東方黎講，新埋班而且對手強，默契明顯唔夠啦。不過中間17號保羅似乎真係有級數，其他鬼都出得果陣再夾下，應該會好過今場了。
陳旭智尋日唔係地球人，係壽星人(嘿)。另，黑色衫係我(嘿)。
No comments:
Post a Comment