4 - 5 - 1

其實我自己係好鍾意4-3-3同4-5-1呢類陣式的，而呢個偏好係由多蒙特簽到真高拿開始，之前我就好鍾意玩4-2-2-2。

0岩0岩車路士收皮。饒家輝講左一個膠野，就係話油王上屆迫摩連奴用舒夫真高拍杜奧巴，迫佢用雙箭頭搞到摩連奴打唔到自己家波，整到杜奧巴表現唔好云云。

明明上季杜奧巴最生果陣，就係舒夫真高有落場果陣。今日場香港波，南華係踢4-5-1，傑志4-3-3。其實4-5-1同4-3-3既分別明顯就係兩隻翼既企位係前定後，但其實4-5-1好定4-3-3好甚至4-2-3-1呢d，要踢得好首先就一定要個中鋒有好極既個人能力，能夠保持到控球權果種，摩連奴就係因為自己有杜奧巴，先成日想咁樣踢，而南華就好明顯，有個係香港屈哂身型既迪天奴。

我自己就覺得，如果係你強隊，係拎住個波黎踢既，如果你個lone striker，係呢類柱躉中鋒，就比較適合踢4-3-3，前鋒另外兩個係呢d可以踢邊可以入中間果d，中場重心就防中位果一個，陣地時可以逗深d分兩邊，上波時打返長線d用中鋒掩護或者set俾兩邊去波，係比較理想。如果個lone striker係走位好速度高果d，就真係要有個好keyman，中場由佢開始上波，陣地時等佢係d最難做野既位做串連，兩邊既球員就最好係純翼唔入中間踢係邊線果種，幫手扯d空位。

講到好複雜？係！其實呢d4-5-1、4-3-3甚至4-2-3-1，係真係一d複雜既陣。如果你個陣係假既，最後都係9-0-1就當然另計，但當你係要主攻或者話係要鬥同人拎形勢去踢既，呢d企位密度唔平衡既陣其實係要夾人夾得好好。

今日傑志開波踢得好差，佢係踢4-3-3，但中鋒既阿古沙未修身(之前個身型真係好fit，但今日好肥)，又懶，要靠兩邊做組織既，另外兩個前鋒都唔係邊線好有威脅果陣，哥倫大部分時間都入哂中間添，班波跟本拉唔到空位出黎。後尾轉3-5-2至3-4-3返而仲簡單，盧沛迪分邊盧均宜同張峰落兩邊，咁就好好多了。

南華又係一個唔係太協調既4-5-1。迪天奴做柱躉係好好的，問題係你d長波黎set俾邊個呢？南華既邊線球員前後出過4個，一係就純出波翼鋒，而會入中間果d又唔夠卡士。我返而覺得話中場冇keyman呢個可能唔係大問題，如果你死都要踢呢個4-5-1，迪天奴做得到控球同二傳，最重要係有一個放到準長炮既人(唔駛話俾得好毒果種)，咁你都有李海強啦，佢明顯唔係keyman，其實要佢打返深d放長波，有一個真正識後上既攻擊型中場都差不多。(好多人會林，4-5-1，兩邊不停出波俾中間果個去頂，掂！問題係你跟本好難做到空位落底線嘛，如果4-4-2，兩個邊中場係有好多人幫佢地組織或者掩護落底，但4-5-1既話，人地好容易就可以騰空一個中堅黎包兩邊，除非你有個好強個人突破能力既翼)

如果你冇d個別能力配合到既球員，4-4-2基本上係最容易平衡既陣，翼同前鋒都比較容易有人呼應同掩護，冇乜邊個位置必要性地以寡敵眾，又冇乜邊個位置要成日替人覆蓋某d空位，簡單容易。

陣係死既，人係生既。如果你d生人唔配合到呢個陣既發揮，冇一個陣係會點強唔強的。話4-4-2容易踢，但你d人唔夾其實一樣唔見得可以好，但佢係容易發揮分工平均既陣係真的，所以先咁主流。

Q1. 今場車路既4-5-1有乜問題？