收刀

大家有睇亞視播由Judy and Mary既雀斑作為第一首Opening既動畫浪客劍心，應該都知道緋村劍心既外號叫快手刀拔刀齋，手持既係逆刃劍。

而漫畫入面劍心既外號係劊子手，有理由相信亞視係為左減底血腥味私自改左個外號。劊子手，即係人斬，劍心呢個外號就係取自幕末數名天誅行動入面既有名殺手：河上彥齋、岡田以藏、田中新兵衛等。

居合，我地呢一代可能好多人第一次聽到就係聖鬥士星矢入面，金牛座既阿魯迪巴，作戰時沒有架式，後來星矢就想起魔鈴曾經同佢提過居合劍法。居合者，亦即係劍心擅長既拔刀術。不難想像，大家想知道多d有關居合既資料去上網search，會搵到話係一種極速出刀再極速後刀既刀法。

到底居合高手係咪真係有能力可以極速出刀同收刀呢？我睇過一d而家練居合度既人話，高手的確可以係一秒左右既時間完成收刀既動作。事實上熟能生巧，唔係冇可能，而居合者要極速收刀既原因，大家不妨重睇一次星矢對阿魯迪巴，不復詳談。

而問題係，到底去練極速收刀有冇重大既意義。拔刀術其實係一種非常高技巧既刀術，你可以想像你用拔刀術，面對一個以正眼四平八穩既架式對住你，要可以拔刀有效攻擊對手而又唔被刀鋒以經出銷既對方先發制人，速度反應真係要高好多皮先有可能做到(劍心既神速，宗次郎既縮地……)。

其實拔刀術，還比較似一種出其不意既刺殺刀法，講求近距離出奇不意地一刀致命，收刀快固然係話可以快速重整，不過到底有冇呢個需要呢？一刀落空，即使你收刀再快，係人地一刀落黎先，定你收刀再拔刀快……不原近距離再補一刀……(如果人地傷到再冇能力出刀，咁你行埋去割頭在手就可以，做乜又要好型咁收刀再拔刀……)

講咁多，其實我係想話……我收刀了，應該唔會再寫全隻碟咁寫樂評了。我短期內應該唔會再有乜時間聽完一隻碟，有一個主題去組織，然後再圍繞主題咁去寫一篇似樣少少既野，你睇上一篇組織差錯字多冇內客……

講開收刀，對「收刀」呢一個詞有印象既係，大家記唔記得有個叫夕樹舞子(直豎拇指)既AV女優訪港，我好記得當年報紙娛樂版講佢去派雪糕，場面冷清，得好多阿伯係到睇佢派，而該份報紙就有一句，講話唔好見直豎咁年輕，其實已經係「收刀復出的沙場老將」。

從此一次過將「收刀」、「沙場老將」收入我腦中既字典了。(的確係，我覺得多d幽默感容易覺得過癮就容易記多d野，我真係覺得用呢句「收刀復出的沙場老將」去形容一個二十歲左右既AV女優好搞笑，另外就好似「五冠王」高樹瑪利亞、「平成三傑」呢D……真係笑鬼死，我成日話，「平成三傑」人氣好明顯高過「漢初三傑」、「維新三傑」甚至「平成歌姬」！)

知識及語文能力，就係咁學返來，你估真係上堂咩？我冇咁得閒上堂聽書，尤其某d全無教學熱訪老師所教既科目……(不過後尾變左老師好有熱誠我都唔聽了)