whiplash girl child in the dark
Venus in Furs by the Velvet Underground
一年一度既AP Band Fes DVD大會……竟然可以聽到性虐待救傷隊既名號。
真係，到左今時今日，係球場見到佢地出黎，都仍然忍唔知抽一抽水的。
講返呢個DVD大會，之前被不同人士叮囑早D訓，早d起身，唔好遲到。真係，我只係好似試過兩次遲大到之嘛(！)……其他網聚我跟本係屬於早到果種的！唔好講到我好似係慣犯咁先得架。
小田和正、Aska、桑田佳祐！呢三part真係好正！
好久不見既Bonnie Pink，我認得佢個樣！但見左一面就被飛了(因為時間關係，間房夠鐘)……
講起Salyu，一行出黎就成為大家取笑既對像！事實我都有份！我不得不由衷講一句，加埋佢著果套衫，一行出黎，真係，我要由衷地講一句：睇落成個哈比人咁！
但我仍然係非常喜歡佢把聲，而且，我仲覺得佢肥0都0都矮得得咁，好可愛啊！(題外話，其實YUKI都算係呢類型……仲有，幅相睇條link點解好似係05年咁)
今日係公司，隱約聽到首歌應該係佢黎的，因為我公司shuffle既歌係包括左Kill Bill OST。Kill Bill？係呀！佢當然唔係酒館入面既the 5678s成員！再講一次，佢首歌係出現係奧馬花曼揀刀果到。
越來越想買返Salyu既碟呀下，唔，真名好似係叫鈴木圭子。
除左Kill Bill，佢亦係青春電幻物語入面莉莉周周把聲。再提一次，呢個句係來自法國印象派作曲家德彪西既女兒既花名，而青春電幻物語傳說配樂上用左唔少德彪西既作品。唔識佢都應該起碼聽過下的，冇睇新紥師妹咩？楊千嬅咪問吳彥祖孩子的天空係邊個作曲？當然，楊千嬅係叫佢德布西，但我鍾意標西。
早排屋企播過一套唔知乜鬼戲，係一個類音樂農莊既餐廳，侍應係吳君如，間餐廳有兩個餐，係分別同左Bob Dylan同John Denver既名黎玩食字Gag。唔知乜鬼戲黎，阿水識得Bob Dylan同John Denver咩！呢d橋林到都應該要放棄啦！正如我成日話，流氓俠醫入面梁朝偉問知唔知點解Stevie Wonder唱歌要郁下郁下個頭，挑！阿水識得Stevie Wonder咩！我唔係玩野，我係認真既，呢d gag搞黎跟本係滿足編劇或導演自己。觀眾有幾多個會有共鳴？多餘啦。
禮物與手信，後補。因為我想post埋相，但我又連唔到去個server……唉。而我拎去抽既，係Oasis既全新精選碟Stop the clocks！原因？好簡單，我呢種咁既人，實借個勢去宣傳自己鍾意既野架啦，係非常合理的(阿正及條利老闆等有睇呢到既csie人可能慶幸緊我上次趕唔切去HK Records買變左買書了)。本身Judy and mary係一個好好既選擇，但冇可能買到。(返而二手度好容易可以搵到Fresh，只係$18，相當低既價，不過當然會貶值了，出左新版2006完全版丫嘛！)
我見全村人都冇乜人鍾意oasis，佢又出精選，0岩哂啦，包唔會有人抽到，然後其實佢屋企已經有，失去宣傳效果。
講起禮物，陳旭智人冇到但禮到果次，佢抽果份仍然係我屋企，我仍然未拆，我懷疑就係阿洲買果隻Tamama模型。
你知唔知我仲係到盤算陳旭智會話唔要，擔心我屋企本身已經有呢隻(經查證之後係冇的！)，到時佢話唔要而盒野要我食左，到時唔通一雞兩味，一盒砌一盒儲咩！
但，佢剛剛打電話黎話有飛拎(最近唔知做乜開聲埋聲都大佬前大佬後)，我同佢講佢竟然叫我去球場拎俾佢。我真係覺得佢係有心營造一個有球迷送禮俾佢既效果。刁！我唔去睇喇，週中八點，睇完返到屋企都成十一點，第二朝又要返工……
最近睡眠不足……今朝真係到左極限……
禮拜五晚朝早五點訓，十一點就出身執拾細軟，好似十一點左右返到屋企，玩Wii玩到四點半，第二日竟然兩點幾識醒……之後一點先訓，第二朝七點就話要起身返工，尋晚又無啦啦兩點先訓……
而家一點了，早抖。
I'm tried, I'm weary
I could sleep for a thousand years
Venus in Furs by the Velvet Underground
No comments:
Post a Comment