和富大埔 4 - 3 愉園

今次係以免費飛入場，加埋月票，嚴格黎講你可以話我係一蚊都冇用過咁入場！

但阿洲識得還錢呀下！我成日都係搭車先醒起，咦，做乜我張八達通咁少錢？之前入左兩舊水一直都用唔到架？係喎！果日睇波麥記我俾錢！佢仲未俾返錢我的！

但，通常記得一下，之後都唔記得左的。



真係精彩，下半場入足七球！祖爾先入一粒之下，先立即俾卓卓飛將軍姿態追和，之前祖爾仲係後面玩波甩拖，卓卓猛虎射球梅開二度！然後走甩哂俾豪豬禁區頂任射。1-3之下我以為要俾人炒添。

問題係，佢三粒波都係入得唔多清楚，一係自己犯錯，一係個人質素，愉園本身係完全冇進攻板斧的！

但愉園又真係唔生銹，成條中後防全場(其實係成隊)表現都好屎，1-3連列卡度自己落埋場，一樣好容易俾人殺到入禁區，史提夫、盧比斯、馮繼志都唔貼身的。

最後4-3，真high到發射了，全場時氣氛實在太正了。即管話香港波唔掂、悶、低水平然後匿係屋企睇曼聯悶戰布力般啦下。不過又講真，之後果場天光隊對大檯客真係悶到呢……如果唔係多左好多阿叔出聲小人，真係冇乜好睇。最慘羅倫士一早紅左，晨曦真係可以擺明慢慢玩夠贏就算。

賽後好多球迷搵球員簽名呀下，隊長都有！不過隊長問：你地知唔知我係邊個？三位小朋友默然。