入場前被學生截停訪問，早知就早d起身化個粧先出黎。仲有，roomate阿基都有入黎睇波添！
入到去，開左波都四分鐘，好快已經見到陳旭智正選鳥！
事實傑志踢起上黎實在太過漫不經意，可能見到兩邊係咁兒吊d高波埋黎，都會好有威脅，加上之前數佢老尾6-1，圍住打半場都冇乜決心整一粒先，賓曹仲踢都好後唔見左咁。
最後臨完上半場俾安基斯偷襲得手呀下！呢個波因為我坐係大埔果邊半場，第一感覺係安基斯同施雲奴終於有d二人合作做到入球。點知返到屋企再睇新聞片，呢球波施雲奴俾得好Q靚！傑志下半場仲收起踢到唔見左人既賓曹以及踢得算係咁既細雞，出返直線盤球撞死馬既阿古沙。
以為陳旭智又要被撞死了……
點知傑志上半場淨係插大埔左路，後尾大埔左路出返退居後備既正選左閘陳思榮，左路守得好好多下，下半場就堆哂係右路去。再後臨完場終於都係被陳肇麒殺食的高波頂入，追和返母會呀下。
大佬，都補時階段了，咁樣輸返轉頭。
今場祖利亞係中場d位置真係好q勁，下下拎到個位一野就閘左個波走，拎住個波又穩，其中一球佢上腳冇人幫，被基夫及譚兆偉雙人夾擊，由中路夾到去邊線都拍佢唔甩，最後基夫一腳趙埋去食埋黃牌，從此基夫呢十分鐘內掂親波都被大埔球迷噓。唔，最慘既係，有份埋人拍祖利亞既雙氧偉都係掂親波都俾人噓！
遙想當年豪豬都仲係小朋友，雙氧偉都叫做同山度士齊名做香港兩大指揮官，都相當多Fans，點知今日都要掂親波都俾人噓呀下。講開又講，當年偉仔好似小登科後就開始冇表現了……
祖爾呢個真係偶像！對愉園發波瘟，對流浪燥火到冇人迫都發老脾bang到個波九樓高，但呢場就利害了，所有高波都俾佢頂走哂咁濟，爭頂頂贏唔0岩位飛身頂走乜都有！傑志全場都只係兩邊吊高波埋去，祖爾真係頂完一球又一球。
不過最後被追和都係高波……
最後一下，後備出黎爆左兩下珠既十號仔呂志興再係禁區頂搏得自由球。我正同阿洲講，睇咁耐大埔既直射自由球都冇乜野睇，除左祖爾d二十幾三十碼衝抽中龍但唔會入既波。但呢個波，真係0岩0岩十八碼唔夠，冇可能唔射，但射你又搵邊個去射呢？
祖爾熨遠柱攪掂！嘩！真係爽！上半季輸1-6啖氣出返！對南華臨完場輸俾楊正光個下都吐埋啦真係！
隊長第一次正選帶隊贏強隊！
係，點解上場對流浪冇講呢？輸波，又冇隊長份，冇乜好講！而且，大埔官網都詐唔知唔提啦……
南華果場黎講，迪天奴仍然是屈，泰利史高斯變返英國人，白鶴都唔似高洛治，李海強唔好玩啦，唔係要炒祖雲奴域呀嘛？
相集：
係，除左陳旭智，仲有亨利仔「太燶」鄭兆偉。同一間中學，同我同屆唔同班的，但以前都有lunch/放學一齊踢波，我都仲記得果陣一齊踢波既F班人黎講我同佢比較好傾的……我仲記得佢講過落雨佢個鼻係可以聞到的！仲有講過一期奪標話傑斯會被改造成中場自由攻擊球員之類……但其他野印象已經好模糊，人都係善忘的，正如太燶都肯定唔記得我了，依到所謂既當年已經係中二、三，足足十年。
純影集：《旺角場的天空》兩幅
No comments:
Post a Comment