華麗蟹后﹣推特系列

話說睇呢個紅van，提到Space Oddity「改變左David Bowie一生」。講返1969年，當時David Bowie已經發行過一張唱片，唔成功。而Space Oddity雖然首個商業突破，但其實亦唔算係乜野大成就，最高排過係英國細碟榜第5，美國第124。

然後Bowie再出多一張有收錄Space Oddity既大碟，延續其迷幻民謠風格，亦係不甚成功。但之後Bowie慢慢改變風格，有自己既backing band，音樂風格越來越重型，亦開始身穿女裝，有所謂「以Iggy Pop既演出風格去玩Lou Reed既音樂」。

1972年，Mac Bolan已經開始奇裝異服及化裝上電視及演出。Bowie亦染紅頭髮兼緊身衣扮外星人Ziggy Stardust，發行The Rise and Fall of Ziggy Stardust and the Spiders from Mars。

Ziggy呢張唱片令Bowie成名，之後既Thin White Duke及柏林三步曲年代持續強勢，甚至可以話柏林三步曲年代係藝術上既頂峰，但真係成為超重量級國際星，係80年代既電子舞曲年代。話雖如此，令Bowie成為經典搖滾一員既，我始終認為係Ziggy年代的。

日本好喜歡Glam Rock年代既David Bowie。一大批既日本八十代出道既流行或搖滾樂手，無謂佢地係玩邊類型既音樂，一樣係深受Glam Rock既影響，發展出視覺系。Bowie可能係Glam Rock大佬，但Mac Bolan卻係Glam Rock係阿爺。

紅van做事用作引子／串連既，係前Glam Rock年代既Bowie，而日本仔既漫畫「20世紀少年」，入面有大量唔同年代既搖滾符號以外，「20世紀少年」就係來自Glam Rock阿爺，Mac Bolan係T. Rex既作品。

再講返轉頭，Bowie等令Glam係七十年代初大行其道，又令到影響佢地既60年代末既Proto-Punk要投入Glam Rock既懷抱去延續其音樂事業，而Bowie亦曾先後替Lou Reed及Iggy Pop監製。而佢幫Iggy Pop渡過難關既故事就更係「感人」。

再講返Glam Rock，雖然Glam era係70年代後半期已經消退，Bowie將Ziggy「殺死」，Mac Bolan等陷入低潮。但除左日本視覺系，重金屬如既Kiss、Motley Crue、新浪漫如Culture Club等，一樣搵到glam rock影子。

又，寶兒定鮑伊？首先，寶兒定鮑兒出道時我唔好話未祟洋媚外，我乜卵都未係啦！寶兒個名細個睇新聞可能睇過兩三次，而由我開始聽寶兒定鮑伊、睇台灣既搖滾文化書時，都係鮑伊。至於港媒由寶兒轉做鮑伊係咪出賣本土（但我唔知咁算奶台定奶共了），可能係。點化解我唔識，去問陳雲根啦。



二十世紀少年，兩個音符就足夠組成一個經典既main riff。





收錄係Ziggy大碟、借講Marc Bolan黎描述Ziggy既歌，demo時叫"He Was Alright (A Song for Marc)."





收錄係Bowie監製既Iggy Pop唱片The Idiot。成為天王巨星後既Bowie，為左幫當年陷入嚴重財困既Iggy Pop，曾翻唱此曲令Iggy收到版稅紓果。

名字也沒有的屍﹣推特系列

我從諗書到工作多年，都冇英文名。小學時我表哥曾經拎本字典出黎俾我揀英文名，我揀左一個同我自己中文名有點關聯既名，但跟本冇用。（我唔知係當年小學生未興用英文名，還是我呢啲山野村夫讀既「鄉校」冇咁西化）我慢慢亦冇乜興趣再用呢個我自己無乜感覺既英文名。

處女座生性挑剔，我亦唔可以話冇諗過改追個英文名，但因為揀唔到鍾意既（又要鍾意又要同自己中文名有關之類），一直都冇。中五畢業前同學突然個個改個英文名黎寫紀念冊，我冇改；中六老外教師英文課第一堂問英文名，我話冇；大學langauge堂問英文名，我都話冇。

第一份工叫阿康，第二份工都係叫阿康。黎到呢一份工，老闆們都係鬼佬，見工問點叫我，我話"hong or yick-hong"。然後IT又走去幫我個network ID用initial，變左YH，HR本身想幫我改，但IT話佢地通常冇英文名既就用initial，算。

老闆個老闆因有份interview，記我叫yick-hong，開頭都咁叫我，份外親切。但之後被老闆改正了，隨波逐流叫我個頭文字。又因為email都係頭文字，我慢慢同其他人自我介紹都係用頭文字，包括之外去美國同啲美國同事我都係咁自我介紹。

我去到美國，第一個官式介紹，係一個product manager，從口音外表應該係一個美國土生土長既印度人，佢個名仍然印度名。佢個名全寫叫Nachiappan，但工作上方便都叫Nachi。佢問我咩名，我話YH，佢再三要我講全名佢知才完事。

而係美國第一天，因為其他iphone app dev都係響三藩巿，而我居然係聖馬刁落腳，所以果邊個手機app大佬（印度人印度名）搵左一個program manager黎關照我，佢口音應該係移民，亦係印度名，叫Gaurav。

招呼左我成日，臨收工前佢走過黎問我咩名，我話YH，佢話唔係要呢個，佢係想知我個名。我話Yick-Hong，佢話得，再話頭文字並唔係我個名，佢唔會用頭文字叫我，佢只會用我個名黎叫我。於是我先突然明白點解Nachi要追問返我個名。

第二日，我就去三藩巿，一波三折下去到office。兩個iOS App dev分別係幾十歲美國大叔同一個三十上下既澳洲人。佢地拉左我去買咖啡，澳洲人問我其實叫咩名，我講佢知兼話佢知因為IT無啦啦用左我頭文字開network ID，方便人認我先介紹自己做YH。

我亦同佢講香港人比較多改個英文名但我冇。佢話係呀，澳洲多亞洲人所以佢都知，佢話你冇咁IT就應該用返你個名，而且你個名都唔難記。又，工作上遇到既亞洲人在美／澳，泡菜㗎佬印度斯里蘭卡邊到都好，好少有人另改英文名而唔用音譯，我諗我都唔駛點「方便啲鬼佬記」了。