當我膠up

煲呔文革論，檯面批評、要求道歉聲音不絕於耳，檯底下眾人竊竊私語，暗笑不止。

結合現今網民用語，煲呔是次言論可以稱為「派膠」。網民派假膠固然冇人知道姓名，換個網名又一條好漢；即使係政黨人士派假膠，多數亦可以用混亂邏輯去騙過思想唔太清晰或對事件認識不深既部分群眾。

派膠，我都真係未見過好似煲呔呢種當住你面除褲派咁赤裸裸。

將文革誤認為民主之極至，當然係膠不可及，有人認為出為曾特首露出馬腳，如余若薇；有人認為是笨人失言，如大部份巿民。而我自己，睇返當日直播煲呔既面部表情精神面貌，我認為煲呔此乃「真心膠」，另一句網絡語言可以稱之為「柒到冇朋友」。

最有趣既地方係，作為特區行政首長，作為香港行政及政治走向既領導人，居然會係呢一個題目上派膠，就好似港聞版記者竟然同港女一樣指住曾灶財叫曾蔭權(都是煲呔當過財爺惹的禍)，整餅師父彷似小朋友一般指住白粉話係麵粉，果然係「人人都可以做大廚」，或者亦係「柒人都可以做特首」。

當然，每次遇上大是大非既時候，總有死士會拍硬檔出黎用細眉細眼去開脫，當年陳鑑林就曾經獨具慧眼，睇穿七一遊行係街上之人都係受唆擺，鏡頭前，面紅耳熱助老董。記得克林頓在任期間食雪加，令人印象最深刻既一句既評語係「道德像隻豬，卻是好總統」。不過，克林頓食乜野加料雪加、將子孫散播到何處，呢個所謂道德問題與當總統無關，因為當總統不是用細佬的(事實所有男人都有兩個器官可作思考)。但我不能不擔心曾特首會否突然有一天用心苦推行民主，推至極止在本港來一場文化大革命，「真心膠」同施政，都係關於腦袋的。

係，好偏激、好極端，亦全無建設性。我只認為﹐即使有人身居某榮光之職，其人未必可敬，其見識亦未必廣博。如果一個榮光之職，上頭要求既係行政能力、虛榮心同埋奴性，位居此職既人可能真係只有過人既行政能力，異乎常人既虛榮心同埋超越你我想像既奴性。大眾想像中既理想、抱負、廣闊胸襟、遠大目光、明白事理，「管他媽的」？

「研究唔深刻姐，hehehehe！」